عن وسطية الحب

رغم اتفاق الجميع على الكلمة إلا أن لكل إنسان تفسيره لها و شكل و حالة تختلف تماما عن الآخرين. لكن مشكلة كتير مننا إنهم أصلا مش قادرين يلاقو تعريف او معنى ليها بالتالي بيعيشو في تخبط طول الوقت في علاقاتهم. مشكلتنا الكبرى هي التطرف في الحب. 

البعض يتطرف ليرى أن الحب شيء محسوس و الطرف التاني عليه انه يفهم و يحس بمشاعرك مش محتاج بقى تقول كلام ولا تتصرف تصرفات معينة تعبر بيها.. الحب عندهم عاقل جدا واحيان كتيرة ممل و مش بيدوه مساحة كبيرة في حياتهم بالتالي ممكن وقت ما يحسو بملل او اي حاجة تدفعهم لانهاء حالة الحب دي ينهوها بسهولة اكبر من غيرهم.. الحب عندهم ثانوي.
 
و النوع التاني من التطرف يرى في الحب حياة. يرفع شعار "مقدرش اعيش من غيرك". حياته محورها الحبيب و إن كان معنى دا إنه يلغي نفسه اصلا ينساها يمحيها يشوهها و احيانا يكرهها. تعلق بشكل فيه الكثير من الهوس لا الحب. تعلق يدمر و يلغي و يخلي صاحبه حاسس بالنقص طول الوقت و بانه اقل من غيره  و انه في مرتبه اقل من حبيبه و انه في احتياج دائم ليه و كأن وجوده زي الدوا الي لو مخدوش هيموت. مأساة النوع دا لما يكون مع حد من النوع الأول.. الحياة لكليهما جحيم بمعنى الكلمة و العلاقة فاشلة و ياريت لو يعيدو نظر فيها، او يحاولو يوسطنو امورهم، لو قدرو هيعملو ثنائي جميل.

الحب جميل و اضافة و بداية جديدة للحياة، لكن ياريت نتعلم نخليه مصدر قوة لينا و للطرف التاني. بلاش تدمر نفسك تحت مسمى الحب و بلاش تدمر حد تاني لمجرد انه حبك. الحب طاقة ايجابية استفيد منها و اديها للي بتحبه.

No comments:

Post a Comment