التعليم والي بيتعلموه






النهاردة كنت في مواصلة عامة و من حسن حظي قابلت  مروة زميلة من ايام ابتدائي كنا من زمان متقابلناش و من فترة اتقابلنا تاني و النهاردة كانت فرصة نرغي و نسلي بعض لان الطريق طويل شويتين تلاتة... انا و مروة كنا من المتفوقين المميزين جدا و اذاعة و القاء و انشطة مدرسية و أوائل صفوفنا بس في الاخر اتخرجنا من كلية تربية و خنقنا الروتين في التربية و التعليم .... فضلنا نتكلم عن وضع المعلم و التعليم ..طبعا لا يخفى علي الجميع ان حال التعليم و المعلم لا يسر .. فضلنا نقارن ازاي زمان كان المعلم دا بالنسبة لنا حاجة كبيرة اوي و كل كلامه صح لدرجة اني صدقت و انا في سنة خامسة ان اليابانيين شبه بعض بسبب القنابل النووية زي ما قال لنا مدرس ^_^ بس الحمد لله لقيت الي يصحح لي المعلومة... افتكرت كمان كم كرهي لمدارس الابتدائي جميعا بسبب مدرسة مهما حاولت مش قادرة افتكر اسمها من كتر ما كانت شريرة اوي معايا.. كنت في مدرسة في القاهرة و انا في سنة اولى ابتدائي وقعت  مدرستي في زلزال 1992و نقلت لمدرسة تانية .. الاول كنت في فصل مدرسته سكرة فاكراها كان اسمها صباح كانت قمة الرقة و الحنية.. بعدين نقلوني لفصل امنا الغولة فضلت اعيط و اقول لها مبحبكيش انا بحب ابلة صباح و هي تزعق لي و تقولي هموتك و جابت لي عصاية طبعا انا كده اتقفلت منها اكتر و من جناني كنت كل شوية اروح احضر اليوم كله في فضل ابلة صباح و اكبر للشريرة دي ... السنة الي بعدها بردو كانت هي مدرستي و فضلت بردو مستقصداني من ضمن جنانها على الفصل كله . كانت بتضربنا على ضهر ايدينا بسبب و من غير سبب مجرد ما تتضايق توقف الفصل كله تضربه على ضهر ايده .. لما جالي حصبة فرحت جدااا اني اخدت اجازة و مش هشوف الست دي لمدة اسبوع بحاله لدرجة اني روحت لها الفصل و قولت لها انا عيانة و مش هاجي و وريتها ورقة الاجازة ^_^ الكارثة ان كل دا كان بيحصل و انا متفوقة و ليا نشاط في المدرسة و كنت بلقي شعر في الاذاعة من و انا في سنة اولى ..الحمد لله ربنا انقذني و نقلت العريش و مدرستي هنا كانت جميلة جدا ..الفكرة بقي ان زمان مكنش في اباء تقول لولادها المدرس الي يكلمك كلمة تضايقك هتصرف معاه  زي دلوقتي ولا بيعرفو ولادهم ايه حقهم وايه مينفعش يحصل و يتدخلو وقت حدوثه وكان الطلبة بيحترمو المدرسين اوي لدرجة ان مبيفكروش يشتكوا الي فعلا يستحق العقاب .. بالتالي كان في مدرسين بيزودوها اوي مكناش عارفين حقوقنا بردو و للاسف كنت بشوف اهالي بيزودوها لدرجة ييجو المدرسة يقولو للمدرسين كسروا و احنا نجبس !!! لا بقى مش للدرجادي ...  طب مش يبقى في شوية توازن عند الجميع يعني الطالب بيحترم مدرسه و المدرس كمان يحترمه و يعامله كويس ؟؟طبعا دا ينطبق على البعض مش الكل ..!!

دلوقتي  بردو تطرف بس في ناحية الطالب بقى ،يعني المدرس الي مش عاجبه يقرفه و الاهالى اغلبهم شايفين ابنهم على حق دايما.. طلبة كتير الاهم عندهم الدرس رغم ان مدرس الفصل ممكن يكون أقوى و كتير كانو بييجو الفصل بنطق غلط و معلومات غلط في اللغة الانجليزية و انا اصحح..بالتالي بقى الي مكتفي بالدرس جاي يتسلى و يقرف المدرس ... و منكرش بردو ان في مدرسين كتير مش مكانهم المدارس خااالص يشتغلو اي حاجة تانية بس بلاش التعليم حرام يعني دول بيدرسوا لبشر..

المدرس الناجح هو الي بيسيب للطالب علامة حلوة في حياته .. مدرسين و مدرسات كتير مروا عليا مش ممكن ابدا هنساهم .. الي قالت لي هتبقي حاجة كبيرة في يوم من الايام و هتشوفي كل ما احقق نجاح بفتكرها و كلمتها بترن في ودني و بتشجعني و قولت لها قريب الكلام دا لما لفت الايام و اتقابلنا . الي قالو لي اد ايه انا مميزة في مادتهم او نشاط في المدرسة و شجعوني . الي علموني حاجة جديدة في الحياة بشكل عام او في موادهم .. الي حببوني في اللغة الانجليزية لدرجة اني قررت ادرسها و اشتغل في تدرسيها و في الترجمة و كانو سبب اني مميزة في شغلي و في اللغة الي درسوهالي .. الي حببوني في اللغة العربية .. الي علموني التجويد .. الي لحد دلوقتي لما يقابلوني بيفخروا جدا بيا و بيشهدولي بالتميز ..  كل الناس دي ناجحين جدا كمدرسين بالتالي نصيحة لكل مدرس يا اما تسيب علامة حلوة في حياة الي بتدرس له يا اما تسيبك من التدريس خالص و شوف حاجة تانية اشتغلها الله يخليك..


محتاجين حاجات كتير تتصحح في منظومة التعليم اولها ان المدرس ياخد وضعه و يتحسن وضعه المادي لاقصى درجة عشان ساعتها بقى يتحط ضوابط لموضوع الدروس دا ... المدرس محتاج تقييم صح بشكل دوري و قبل التقييم تدريبات فعالة بجد تحسن من مستواه و تطوره ..اي نعم في تدريبات فعلا بس روتين و قليل اوي الي ممكن نستفيده منها.. المدرسين محتاجين تقييم نفسي مستمر عشان ميجيش حد يطلع عقده على الطالب .. محتاجين كمان عقاب حقيقي للطالب يردعه عن اي اساءة في حق المدرس .. اما بالنسبة للمناهج الحل الوحيد ليها النسف الكااامل لكل المناهج و نبدأ من الاول  و بلاش حشو و لك كتير و حفظ و تسميع ..

التعليم اهم حاجة لاي دولة بيها ممكن الناس تتغير للاحسن و نبقى احسن بلد و يطلع اجيال بتغرف تفكر و تتصرف صح .. التعليم الفاشل هو الي بيطلع ناس دماغها فاضية و معندهاش اي اساس ثقافي سليم بالتالي سهل اوي اي حد يجذبهم بكلمتين و يوجههم لاي تيار غلط من اول بقى فكر ملخبط لحد الارهاب و التطرف الديني . التعليم الفاشل هو الي بيخللي الناس تصدق اي حاجة و تمجد اي حد و تهلل و تصقف لاي كلام يتقال لهم و تتخانق مع اي حد يعترض على الي بيهللو له ..  و الشخص الي بيمجدوه و يقدسوه يحطو حواليه هالة و يرتقو به إلى الملائكية بالتالي الي بيقوله و بيعمله كله صح و الي يعترض يبقى كافر او ضد البلد او عميل و عايز يدمر البلد . سهل اوي ان اي حد عايز تشوهه تطلع عليه اشاعات ملهاش اي اساس و الناس تصدق لان ثقافة البحث و التثبت من المعلومات مش منتشرة .. سهل جدا تستخدم ألفاظ و مصطلحات مش منتشرة و تقول للناس دي معناها كفر و ضد الدين و الناس تصدق .. سهل تتاجر بالدين و تضحك على الناس و يصدقوك لان مفيش اساس يحصن عقولهم ضد كل دا .. كل الي محتاجينه تعليم صح عشان نتغير للاحسن لان لو مر مليون سنة و احنا زي ما احنا و لو حتى عملنا مليون ثورة مش هيتغير حاجة المشكلة فينا احنا كأفراد .. لو اتحلت بتعليم صح و تثقيف حقيقي للناس الوضع هيتغير..

No comments:

Post a Comment